Audio Seinaleak garraiatzeko modu honek ahalbidetzen du irratsaioak Interneten ipintzea eta, bideo seinaleei aplikatuta, gero eta kalitate onargarriagoa duten bideoklipak sarean zabaltzea ere bai.

Audio "jarioa" esanez itzul genezakeen kontzeptua dugu. Audio seinaleak gure ordenagailura ekartzeko modu bat da. Audio, testu, irudi eta bestelako artxiboak garraiatzeko ohiko moduaz bestelakoa da: normalean artxiboa zabaldu ahal izateko (ikus, entzun edo irakurtzeko) osorik ordenagailura "jaitsi" behar da saretik. Streaming audio formatoak erabiliz, seinalea gure ordenagailura heldu ahala entzun dezakegu, ez dugu artxiboa guztiz kargatu arte itxaron beharrik izango eta nahi dugun momentuan entzuteari utzi ahal izango dugu.

Sareko abiaduran gorabehera handiak daudenez, jarioa entzuteko prestatuta dauden programek "buffering" egiten dute: seinalea heltzen hasten denean, segundu batzuetan ez dugu ezer entzungo, programa seinale hori metatzen ari delako, ondoren kalitatearekin eta jarraian eskaintzeko. Puxikadun gaita baten antzera, programak bere memoria datuez "puztu" egiten du, ondoren guri eskaintzeko. Horregatik segundu batzuetako atzerapenarekin jasotzen dira zuzeneko emanaldiak.

Baina, tamalez, gerta daiteke sarean kongestioa izatea eta datuen "puxika" hori guztiz hustea. Kasu horretan soinua entzuteari utziko diogu, nahikoa datu berriz buffer-ean metatu bitartean. Kasu horretan "net congestion - rebuffering" (RealPlayer-en kasuan) edo antzeko mezua irakurriko dugu audioa entzuteko erabiltzen ari garen programan.
 

Formato ezberdinak

Nork bere formatoa inposatzeko lehia bizia dago enpresa batzuren artean. Funtsean antzekoak diren formato horietan famatuenak RealAudio eta Windows Media Player ditugu. Lehia horretan gero eta garrantzi handiagoa ari da hartzen Apple enpresaren QuickTime formatoa eta, oso kalitate ona duen arren, Streamworks formatoa baztertuta geratzen ari da.
 

Shoutcast sistema

Gure zuzeneko emisioak Shoutcast sisteman egingo ditugu. Shoutcast audio artxiboen streaming-a egiteko beste sistema bat dugu. Haren ezaugarririk interesgarriena artxiboen formatoa da: MPEG Layer 3 formatoko audio artxiboak streaming moduan igortzeko sistema dela. MP3 izenarekin ezagunagoak diren artxibo hauek sarean musika banatzeko formaturik hedatuena bihurtu da azken aldion. Izan ere, konpresio maila altuak lortuz kalitaterik onena mantentzea lortzen du MP3 formatoak.

Beste ezaugarri interesgarri bat formato irekia izatean datza. Plataforma guztietan badira MP3 artxiboak entzuteko programak eta artxibo hauek stream moduan hainbat programaren bidez entzun daitezke. Artxibo horiek zein zuzeneko emanaldiak stream-en emititzeko antzekoak diren Shoutcast eta Icecast sistemak programa horien bidez entzun daitezke.