jabea-(r)en bidalketa guztiak

irratia.com bihar berriro uhinetan

Bihartik aurrera denboraldi berriari ekingo dio irratia.com irratsaioak. Teknologia berriak, Internet eta gure kultura zahar eta txiki honek bide hauetan dituen aukerak, beharrak eta mugak izango ditugu hizpide asteartero zuzenean 18:00etatik 19:00etara Bilbo Hiria irratiaren uhinetan eta irrati-bitakora honetan bertan ere. Irratiz FMaren 96an entzuteaz gain (Bilbo Handian), Interneten entzun daiteke gure irratsaioa. Gainera, zuzenean entzuterik izan ez duenak izango du gerora aste bakoitzeko saioa deskarga bidez eskuratzeko aukera.

Entzuleek ere har dezakete esku irratsaio interaktibo honetan baita euren ahotsa entzunarazi ere, munduko edozein bazterretan egonda ere. Gurekin harremanetan jartzeko 94 424 37 04 telefonoaz gain, Skype erabil dezakezue, bilbohiria erabiltzaileari hots eginda. Esan bezala, bihar zuzenean elkar ikusiko-entzungo dugulakoan…

Radiokultura.com irratiak irailean hasiko ditu emisioak, Hazparnetik

Sarearen bitartez, nahierako irratia egingo dute, eta eduki gehienak euskaraz izango dira

URTZI URKIZU – BERRIA egunkaritik hartua. Euskal Herrian aitzindaria den proiektu bat jarri dute martxan Hazparnen: Radiokultura.com. Soilik Internet bidez emitituko duen irrati bat izango da, eta bertan entzuleak nahi duen orduan entzun ahal izango ditu programak. «Irratia nahierara izango da», azaldu du proiektuko koordinatzaile Mikel Etxebarriak. Irailaren amaieran espero dute emanaldiekin hastea.
Jarraitu Radiokultura.com irratiak irailean hasiko ditu emisioak, Hazparnetik irakurtzen

Saio zaharrak (eta podcast berriak) entzungai

Aupa, oporretan gaude, ekainaren 14az gero. Hala ere, egunotan lanean ibili gara eta gure lehenengo irratsaioa berreskuratu ahal izan dugu. Sarean ezarri dugu entzungai 2004ko abenduaren 14ko saioa, estreinakoa, eskuratu eta entzun dezazuen. Halaber, maiatzaren 10eko eta maiatzaren 31ko irratsaioak ere berreskuratu ahal izan ditugu (asko kostata). Zuen gustokoak izatea espero dugu. Era berean, ezin aipatu gabe utzi euskarazko beste podcast baten agerpena. Gorka Juliok egiten duen Teketen i-rratsaioaren lehenengo emanaldia (MP3 artxiboa) entzungai dago bere bitakoran. Ea laster gehiago entzuterik daukagun!

23. saioa: Papera / Digitala, gogoetak

Azkenik lortu dugu saioa ondo grabatzea, mp3ra pasatu ahal izateko. Gaurkoan, gure gogoeten gainean ezezik, Luistxok idatzitako Papera / Digitala testua aztertu dugu. Vilaweb ere izan dugu hizpide, azken 10 urteotako kazetaritzaren bilakaeraren inguruko jardunaldia antolatu baitu Kataluniako komunikabide erabat digital honek. Blogpulse, saharauien Ciberintifada, Lemoizko gatazka gogoratzeko webgunea , Kopyleft jardunaldiak eta Igorringoren weblog euskaldun berria ere aipatu ditugu gaurko saioan.

Saioa eskuratzeko egin klik HEMEN (MP3 56 Kbps mono, 22 MB).

21 saioa

Gaurko saioan denetarik izan dugu, euskal blog berriak (tartean euskal tabernari batena eta Nire etxeko leihoa izenekoa), memeak, Feedmaniaren itxiera, Skyperen erabilera elkarrizketak egiteko, Blogak eta Gipuzkoako Foru Aldundia, saharauien intifada (eta argazkiak), BBVAren aurkako phishing erasoak, euskalug.org, Pausumedia eta beste.

Bere garaian ezin izan genuen irratsaioa mp3 formatora pasatu, arazo teknikoak direla medio, baina dagoeneko entzungai daukazue.

Saioa eskuratzeko egin klik HEMEN (MP3 56 Kbps mono, 24 MB).

20. saioa

Gaurkoan hainbat kontu izan ditugu hizpide irratsaioan. Munduko emakumeen martxarekin abiatuta, disketxe alternatiboa sortzeko proiektua, kopyleft jardunaldiak, Gazte sareak argitaratutako blogak eta berauek azkenik burutu duten WordPress kudeaketa sistemaren euskaratzea, Google pertsonalizatua, MCD taldearen agurra… Aurkik dagoeneko jarioak 200 iturritatik edaten dituela aipatu dugu, euskal blogosferaren indarraren seinale. SGAEk proposatutako azken astakeria eta kanonaren inguruan Espainiako senatuan izandako bozketa ere aipatu ditugu gaurkoan.

Saioa eskuratzeko egin klik HEMEN (MP3 56 Kbps mono, 24 MB).

Richard Stallman-en bideoa

Richard Stallman zuzenean ikusteko edo entzuteko aukera izan ez duzuenok hemen duzue aukera. eMulen aurkitu dugu Katalunian egin dioten elkarrizketa hau. Bertan, software libreari buruzko argibideak ematen ditu entzulegoarentzat. Katalanez eginiko galderei gaztelaniaz erantzuten dizkie Stallman-ek, DivX formatoan grabatutako elkarrizketa honetan. Canal 33-eko La nit al dia saioan eginiko elkarrizketa honetan Stallmanek ederto azaltzen ditu software librea, jabedun softwarea, GNU, open source eta horrelako kontzeptuak. Bikain agertzen du bere filosofia eta edukien banaketa (edukiak, truke librea, musika), software patenteen afera eta beste gai askoren gainean duen iritzia azaltzen du 24 minutuko elkarrizketa honetan. Zinez gomendagarria.

HEMENDIK jaitsi dezakezu zure ordenagailura eta ondoren, DivX formatoa irakurtzen duen programa batekin ikuskatu (DivX player edo beste bat). Bideoak 109 MegaByte pisatzen du (kontuz!) konexio azkarra eta pazientzia eskatzen du, beraz, baina itxaroteak merezi du.

WordPressera aldaketa eta arazoak mp3ekin

Igarriko zenutenez, irratia.com honen itxura aldatu da azken egunotan. Movable Type utzi eta WordPressera aldatu dugu gure edizio sistema. Horregatik aukera batzuk eta informazio batzuk oraindik behar bezala ez dira ikusten. WordPress-erako aldaketaren gainean jardun dugu, besteak beste gaurko irratsaioan, aldaketarako arrazoiak emanez. Funtsean diseinu moldagarriagoa, aukera gehiago, doako lizentzia eta RSS irakurgailuen bidez podcast-ak irakurtzeko aukera zuzenagoa (enclosure delakoen bidez) dira aldaketarako arrazoi nagusiak. Laster behin-behineko itxura hau behar bezala informazioz hornituko dugu.

Bestalde, iragan asteko saioa eta gaurkoa, momentuz, ezin izango ditugu sarean eskegi, berauek gordetzen dituen ordenagailuak arazoak baititu irratsaio horiek ireki eta mp3ra pasatzeko. Ahal bezain laster saiatuko gara hau konpontzen.

P.D. KONPONDUTA: saioa eskuratzeko egin klik HEMEN (MP3 56 Kbps mono, 23 MB).

17. saioa

Aste honetako saioan Informatikari Euskaldunen V. bilkuran ikusitakoaz jardun dugu. Beste gai batzuk ere aipatu ditugu: Euskal Kultur Erakundearen webgune berria, Googleren iragarkiak, Amazon-en OpenSearch tresna interesgarria 13 M, Multitudes Online liburua…

Entzungai berezi bi izan ditugu gaurko saioan: La Haine kontrainformazio webguneak argitaratutako diskoa eta R13 talde euskaldunak CC lizentziapean ateratako diskoa.

Saioa eskuratzeko egin klik HEMEN (MP3 56 Kbps mono, 24 MB).