Elkarrizketa .bxt-rekin

Formerly known as Bixente Iriart

IRRATIA.COM: Iparraldeko hainbat taldetan aritua zara (Txakun, Anje Duhalde) baina gerora Pariserat abiatu zinen...

bxt: 1990. Urtearen inguruan Iparraldeko taldeetan baxua jotzen hasi nintzen, estilo ezberdinak jorratzen zuten taldeetan, baina betidanik reggae musika anitz entzun izan dut. 92-93 uteetan reggae digital mugimendu handia zen Inglaterran eta biziki atsegin nuen. Dreadzone, Zion Train edota Ariwaren ekoizpenak. Orduan ordenadorearekin, teklatuarekin hasi nintzen lanean... zuzeneko emanaldietaz gogaitu eta errazagoa iduritzen zitzaidan lanak bakarrik ekoiztea, makinen laguntzaz, bertze musikariekin lanean aritzea baino.

Musika sortzen hasi nintzen, hastapenean oso gauza abstraktuak egin nituen Euskal Herrian ekoitziak izan ahal izateko. Pariserat abiatu nintzen, ordurako bertan bainituen lagun zenbait. 

IRRATIA.COM: Badirudi digital dub delakoa atsegin duzula, zein da zure proposamena? Zertan ari zara egun?

bxt: Ene ustez, batipat reggae eta dub musikaren garai bat atsegin dut, 70. Hamarkadako reggaean nago gelditurik, eta baita 90 hastapeneko bilakaera digital eta jungleen. Hala ere, egungo artista batzuk ere maite ditut, Maurizio edota Pole kasu.

Egiten dudan musikan oso gauza ezberdinak daude. Ene lehen lan honek, "soupçons" ez du zerikusi handirik dub edo reggaearekin, eragina duen arren, baina ez da dub. Egin nahi dudan musikaren atal bat da, minimalista, egungo joerekin zein jazzarekin nahasturik, agian intelektuala iduri du.... baina musika oso askea da niretzat. 

Baina jarraitzen dut dub eta reggae egiten. Reggae disko oso bat egitea da nire asmoa, bertsio eta guzti. Egun, lanean dihardut eta kanta gehiago sortzen ditudanean abeslari batzuekin batera hasiko naiz.

Parisen bizi zara egun, zigilu batean ari zara, baina jartzen al duzu musikarik edo baduzu talderik? Kontaiguzu.

bxt: Gure zigilua antolatu dugu, Counter Reset Parisko lagun musikari batzuekin batera. Nire lehen lana karrikaratu dugu, eta orain Nutcase aka Blast-en 12" karrikaratuko dugu. Iparraldekoak dira eta hauek ere Parisen bizi dira. 

Nik zuzenean jotzen dut, ni bakarrik aparagaiku ezberdinekin. Dub nahasketak egiten ditut zuzenean, zerbait arraroa da... Live hau Parisko hainbat tokitan eskaini dut (Batofar, Glaz'art) eta baita Euskal Herrian ere BED diskoaren aurkezpenean. Batzuetan diskoak jartzen aritzen naiz, Elektrogaian izan nintzen. Ez dira DJ set ohikoak, ni disko jartzailea ez naizelako, ez daukat teknika hori, nahasketa minimalistak dira, dub, reggae... Zigiluarekin, Parisen jai batzuren antolatzen saiatuko gara.

Aspaldi ez dela, #bed lana karrikaratu zenuten, zertan ari da "Basque electronic Diaspora" egitasmoa? Noizko hurrengo lana?

bxt: Orain, #bed 2 prestatzen ari gara, eta bira handi bat egin nahi dugu Basque Electronic Diaspora eta gonbindatuekin. Dena ondo baldin badoa, 2001 urtearen hasieran karrikaratuko dugu bed #2.