Lehendabiziko euskal irrati digitala sortu dugu zoro batzuren artean. Sekulako azpiegitura eduki gabe baina konplexurik gabe abian jarri dugun esperientzia hau forma gehiago hartuko dituen proiektu baten baitan dago. Gure helburua bikoitza da: euskal kultura digitalizatzea eta kultura digitala euskalduntzea. Proiektu zabal horren adierazpen zehatz bat da euskal irratia digitalizatzea helburu duen hau.

MUSIKA KANALAK - Eguneko 24 orduetan euskal musikarik onenaren aukera zabalduko dugu musika kanalen bidez. Momentuz, sei irrati kanal sortu ditugu euskal musikarik onena "stream" jarioan ziberespaziora igortzen. Hala nola, kanal nagusiaz gain, "Txosna Rock", "Elektronik", "Triki Soundz" eta "euSKA-reggae" kanalak martxan dira. Hauetako kanal bakoitza DJ (edo, hobe esan, IJ) baten ardurapean egongo da eta, laster, "Folk", "punk-hardcore" eta "Heavy" kanalak ere gehitzeko lanean ari gara.

ZUZENEKO IRRATSAIOAK - Zuzenean emango ditugu zenbait irratsaio gure kanal nagusian: hasteko, "Jalgi Hadi Dantzarat" irratsaio teknofiloa asteazken gauero. 21.00etatik aurrera. Aurrerago, zuzeneko irratsaio gehiago gehituko ditugu eta zenbait ekitaldi garrantzitsuren berri zuzena emango dugu bertatik bertara.

CHAT BERRIKETA - Entzuleek aldi bereko IRC "chat" berriketa zuzenean egin ahal izango dute irratiko esatariekin euren galderak eta iruzkinak bidaltzeko. Gure #irratia kanalera sartzeko IRC chat programa bat edukitzea gomendatzen dugu. Bestela, beti izango dugu webetik bertatik sartzea.

GRABATUTAKOAK - Grabatutako irratsaio eta elkarrizketak aurkituko dituzu hemen: emanaldi bereziak, "Hitz Egin sarea" eta "Euskal Herria Zuzenean", besteak beste. Gainera, laster, hainbat euskal DJen sesioak eta eremu lokaletik at entzungai ez diren irratsaio interesgarriak eskainiko ditugu mundu osoarentzat. Gure ekimena Bizkaitik abiatu den arren, mugaz gaindiko ibilbidea hasi nahi izan dugu Eki Euskal Herriko zenbait musikariren lanak erakutsiz, gure ikuspegia Euskal Herri osokoa dela islatu nahian.

Gure helburuak eta izaera (2)